ចែករម្លែកបទពិសោធន៍​កាល​នៅ​វៀន​អនុវិទ្យាល័យ​និង​វិទ្យាល័យ

រូបតំណាង

*ចំណាយពេល ៥នាទី អានអត្ថបទនេះ នោះអ្នកនឹងទទួលបានបទពិសោធន៍ដ៏ល្អៗសម្រាប់ជីវិតសិក្សារបស់អ្នក

កាលខ្ញុំថ្នាក់ទី៩ របៀបរៀន​របស់​ខ្ញុំគឺមាន​គម្រោង​ច្បាស់​លាស់​ណាស់ ចំពោះមេរៀន ដូចជា សីលធម៌-ពលរដ្ឋ ប្រវត្តិ ភូមិ ផែនដី...ខ្ញុំបាន​ចំណាយ​ពេល​ទន្ទេញ​មេរៀន​ទាំងនោះ​ដោយដំបូង​គឺត្រូវ​ទន្ទេញ​សំនួរ-ចម្លើយ​ក្នុង​សៀវភៅ​ពុម្ពជា​រៀង​រាល់ថ្ងៃ គឺចាប់ផ្តើម​តាំងពីចូលថ្នាក់ទី៩ នៅថ្ងៃដំបូងម្ល៉េះ។

មិនថាពេលទំនេរណាឡើយ កូនសៀវភៅកំនែគឺនៅក្នុងហោប៉ៅខ្ញុំជានិច្ច សូម្បីដាំបាយ ក៏ខ្ញុំ​អង្គុយ​មុខ​ចង្រ្កាន​ហើយ​ទន្ទេញ​មេរៀន​ដែរ។

ខ្ញុំបាន ​#ចែកកាលវិភាគច្បាស់លាស់ ដោយពេល​យប់​ត្រូវធ្វើលំហាត់ គណិត រូប គីមី (ក្រោយ​បាយ​ហើយ ម៉ោង​៧កន្លះ ទៅ​រហូត​ដល់​ម៉ោង ១០​កន្លះ​យប់) ហើយពេល​ថ្ងៃ​ទំនេរ​ពីម៉ោង​រៀន ឬ​ថ្ងៃ​សម្រាក​គឺទន្ទេញ​មេរៀន​ឬ​ធ្វើលំហាត់។

ពេលនោះ (ឆ្នាំ​២០០២) មុខវិជ្ជា​ដែល​ខ្ញុំចូល​ចិត្តជាង​គេ​គឺ​គណិតវិទ្យា ខ្ញុំបាន​ស្រាវជ្រាវ ក៏​ដូចជា​រកទិញ​សៀវភៅ​ផ្សេងៗ​ដែល​ទាក់ទង ពិសេស​សៀវភៅ​កម្មវិធី​ចាស់ ដែល​មាន​លំហាត់​ខ្លាំងៗ មករៀន​ធ្វើ​ដោយខ្លួនឯង ហើយ​ចំពោះ​លំហាត់​ដែល​មិនយល់​ខ្ញុំ​យក​ទៅ​សួរគ្រូ​បន្ថែម។

ខ្ញុំបានចូល​ប្រលង​សិស្ស​ពូកែគណិតវិទ្យាប្រចាំស្រុក ខ្ញុំជាប់លេខ៣ ហើយក៏បន្តទៅ​ប្រលង​សិស្សពូកែ​ថ្នាក់ខេត្ត(កំពត)ទៀត។

ជាលទ្ធផលខ្ញុំជាសិស្សតែម្នាក់គត់មកពីស្រុករបស់ខ្ញុំដែលជាប់ថ្នាក់ខេត្ត គណិតវិទ្យាទី៩ លេខ៣។

ខ្ញុំក៏បានចូលរួមប្រលងសិស្សពូកែថ្នាក់ជាតិ(ទូទាំងប្រទេស) ដែលកាលនោះ(២០០២) ធ្វើឡើងនៅខេត្តសៀមរាប។ ខ្ញុំពុំជាប់ទេ ពេលនោះ ព្រោះគេយកត្រឹមលេខ១០ តែខ្ញុំជាប់លេខ១១។

រូបតំណាង

ខ្ញុំរក្សាធ្វើទំលាប់នេះរហូតដល់ពេលប្រលងឌីប្លូម គឺលទ្ធផលចុងក្រោយ ខ្ញុំប្រលងបាននិទ្ទេស ល្អ។

ក្រោយពីបញ្ចប់ថ្នាក់អនុវិទ្យាល័យ ជីវិតវិទ្យាល័យក៏មកដល់ ខ្ញុំនៅរក្សាទំលាប់រៀនរបស់ខ្ញុំនៅដដែល ដោយធ្វើការកែប្រែខ្លះៗទៅតាមស្ថានភាពរៀនពេលនោះ។

ចូលថ្នាក់ទី១០ ខ្ញុំបានប្រឹងប្រែងច្រើនលើមុខវិជ្ជាគណិតវិទ្យា(គោលដៅប្រលងសិស្សពូកែថ្នាក់ទី១២) ដោយស្រាវជ្រាវរកឯកសាចាស់ៗ វិញ្ញាសាចាស់ៗ មករៀនធ្វើ។ ហើយចំពោះមេរៀនផ្សេងៗដូចជា ភាសាខ្មែរ ជាដើម ខ្ញុំមិនបោះបង់ចោលឡើយ គឺខ្ញុំប្រឹងអាន ទន្ទេញចំណុចសំខាន់ៗ ក៏ដូចជាស្រាវជ្រាវបន្ថែម ពិសេសលើមុខវិជ្ជាចំណេះដឹងទូទៅ(ប្រលងសិស្សពូកែទាមទារ ចេះចំណេះដឹងទូទៅខ្លាំង)។ ខ្ញុំក៏ជាសិស្សពូកែខាង ភាសាខ្មែរ ម្នាក់ដែរ។

ចូលដល់ថ្នាក់ទី១១ ខ្ញុំក៏មិនផ្លាស់ប្តូរទម្លាប់រៀនរបស់ខ្ញុំដែរ គឺនៅបន្តទំលាប់នេះរហូត បើទោះជាមិនមែនឆ្នាំប្រលងថ្នាក់ជាតិក៏ដោយ។ ដើម្បីដុះខាត់ចំណេះដឹងគណិតវិទ្យាបន្ថែម ខ្ញុំរៀនធ្វើលំហាត់គណិតពីសៀវភៅវៀតណាម និងសៀវភៅជាច្រើនទៀតដែលបោះពុម្ពលក់នៅទីផ្សារ ហើយខ្ញុំក៏បានចូលរៀនគួរជាមួយសិស្សថ្នាក់ទី១២បន្ថែម ព្រោះលំហាត់ថ្នាក់ទី១១ ក្នុងសៀវភៅពុម្ព ខ្ញុំធ្វើអស់មុនគ្រូបង្រៀនទៅទៀត។ នរណាៗក៏មើលមុខខ្ញុំដែរ ថ្នាក់ទី១១សោះ តែមករៀនជាមួយសិស្សថ្នាក់ទី១២ ។

ឆ្នំានោះដែរ ថ្នាក់ទី១២ បានរៀបចំប្រលងសិស្សពូកែថ្នាក់ស្រុក ខ្ញុំក៏សុំគ្រូចូលប្រលងលេងជាមួយបងៗថ្នាក់ទី១២ដែរ លទ្ធផលមិនគួរឲ្យជឿ គឺពិន្ទុខ្ញុំធ្វើបានច្រើនជាងគេ(លេខ១)។ នេះជាដើមទុនមួយដ៏ល្អរបស់ខ្ញុំ ដើម្បីឈោងចាប់យកគោលដៅរបស់ខ្ញុំនៅថ្នាក់ទី១២ដែលនឹងមកដល់ក្នុងពេលឆាប់់ៗខាងមុខ។

ចូលឆ្នាំថ្មី(២០០៥) ថ្នាក់ទី១២ របស់ខ្ញុំក៏បានចាប់ផ្តើម។ ឆ្នាំនេះជាឆ្នំាប្រលង ដូចនេះខ្ញុំបានរៀបយុទ្ធសាស្រ្តបន្ថែមចំពោះពេលវេលារៀនរបស់ខ្ញុំ។ ពេលថ្ងៃខ្ញុំត្រូវទន្ទេញមេរៀន លើមុខវិជ្ជាអក្សរ ដូចជា សីលធម៌-ពលរដ្ឋ ប្រវត្តិ ភូមិ ផែនដី ... ដោយក្នុងខ្លួនត្រូវមានកូនសៀវភៅកំណែជាប់ខ្លួនជានិច្ចដើម្បីឆ្លៀតមើល។

ឯមុខវិជ្ជាវិទ្យាសាស្ត្រដូចជា គណិត រូប គីមី គឺខ្ញុំរក្សាកាលវិភាគធ្វើនៅពេលយប់ដដែល តែខ្ញុំផ្តោតលើគណិតវិទ្យាច្រើនជាងគេ។ នៅពេលដែលយើងធ្វើលំហាត់បានច្រើន ពិសេសលំហាត់ដែលដកស្រង់ពីការប្រលងឆ្នាំមុនៗ នោះយើងនឹងសង្កេតឃើញថា លំហាត់មិនពិបាកដូចអ្វីដែលយើងគិតឡើយ គ្រាន់តែមើលប្រធាន យើងនឹងដឹងថាធ្វើយ៉ាងម៉េចរួចទៅហើយ។

ឆ្នាំនេះខ្ញុំត្រូវឆ្លងកាត់ការប្រលងជាច្រើន លើសសិស្សដទៃៗទៀត ព្រោះខ្ញុំត្រូវត្រៀមថ្នាក់ប្រលងសិស្សពូកែ។ ចូលដល់ដើមខែមេសា ជារដូវប្រលងសិស្សពូកែ ខ្ញុំក៏ត្រៀមខ្លួនជាស្រេចដើម្បីប្រយុទ្ធលើសមរភូមិសិក្សានេះ។ ខ្ញុំក៏ប្រលងជាប់ជាបន្តបន្ទាប់ គឺថ្នាក់ស្រុកលេខ១ ហើយចូលដល់ថ្នាក់ខេត្តជាប់លេខ៤ (កាលនោះលេខ ១ និងលេខ ២ គេឲ្យជាប់អូតូម៉ាតិច(Automatically) ព្រោះពួកគេធ្លាប់ជាប់ថ្នាក់ទី៩ ) ដែលអ្នកជាប់លេខ បីខេត្ត​ខាងគណិតវិទ្យា​នោះគឺជាមិត្តជិត​ស្និទ្ធខ្ញុំដែរ យើងរៀនជាមួយគ្នា។

ក្រោយពីជាប់ថ្នាក់ខេត្តហើយ​យើងក៏ទៅចូលរួមប្រលងថ្នាក់ជាតិបន្តនៅខេត្តសៀមរាបដដែល (ពេលនោះ​សាលា​ខ្ញុំជាប់៤នាក់ ថ្នាក់ទី៩ ពីរនាក់ និងទី១២ ពីរនាក់)។

ខែ ឧសាភា ២០០៥, លទ្ធផលនៃការខំប្រឹងប្រែងរបស់ខ្ញុំក៏បានសម្រេច ខ្ញុំទទួល​បាន​ជ័យលាភី​សិស្សពូកែ​គណិតវិទ្យា មេដាយសំរឹទ្ធ(លេខ៣) ឯមិត្តភក្តិដែលទៅជាមួយខ្ញុំគាត់ជាប់លេខ ៤ ឯប្អូនម្នាក់ថ្នាក់ទី៩ ខាង​រូបវិទ្យា គាត់ជាប់លេខ៧ (ជាប់៣នាក់ក្នុងចំណោម៤នាក់ដែលមកពីសាលាតែមួយ)។

ក្រោយពីបញ្ចប់ការប្រលងសិស្សពូកែទូទាំងប្រទេសរួចមក អ្វីដែលខ្ញុំត្រូវធ្វើបន្ទាប់គឺត្រៀមប្រលងឆមាសទី២ ខ្ញុំត្រូវរៀបចំគម្រោងបន្ទាប់ដោយផ្តោតលើកការប្រលងនេះ គឺត្រូវបុករៀនមុខវិជ្ជាអក្សរឲ្យបានច្រើនឡើង។ ក្រោយចប់ឆមាសទី ១ និងទី២ លទ្ធផលដែលខ្ញុំទទួលបានទាំងពីរឆមាសគឺល្អណាស់ ពិន្ទុ​មធ្យមភាគ​ទាំង​ពីរ​ឆមាស គឺបានខ្ពស់ជាងគេទូទាំងវិទ្យាល័យ។

ពិន្ទុប្រចាំឆ្នាំដែលខ្ញុំយកទៅសម្រាប់បូកជាមួយពិន្ទុបាក់ឌុប គឺខ្ញុំបានពិន្ទុកម្រិត និទ្ទេស B ពីសាលាទៅ។

ឆាក​ប្រយុទ្ធ​ចុងក្រោយសម្រាប់ឆាកជីវិតសិស្សវិទ្យាល័យក៏ជិតចូលមកដល់ (បាក់ឌុប)។

ខ្ញុំបានប្រឹងរៀនទាំង​យប់ទាំងថ្ងៃដើម្បីត្រៀម ចំពោះការ​ប្រលងបាក់ឌុប​នេះមិនថា​មុខវិជ្ជា គណិត រូប គីមី ឡើយ មុខវិជ្ជា ខ្មែរ ពលរដ្ឋ ប្រវត្តិ ភូមិ... ខ្ញុំត្រៀមរួចជាស្រេច។

នៅថ្ងៃប្រលងបាក់ឌុប ខ្ញុំធ្វើបានយ៉ាង​ល្អគ្រប់មុខវិជ្ជា ជាលទ្ធផល​ខ្ញុំទទួលបាននិទ្ទេស B (99.843) ដែលទូទាំង​ស្រុកមាន​អ្នកបាននិទ្ទេស B តែពីរនាក់គត់គឺខ្ញុំ និងមិត្ត​របស់ខ្ញុំម្នាក់ទៀត​ដែល​ជាសិស្ស​ពូកែទូទាំង​ប្រទេស​លេខ៤​នោះ គាត់ទទួលបាន B (99.1+)។

*ការរៀបចំគម្រោងសិក្សាច្បាស់លាស់ នឹងនាំជោគជ័យដល់យើងមិនខាន

*សង្ឃឹមថាអត្ថបទនេះនឹងផ្តល់ប្រយោជន៍ដល់ប្អូនៗដែលជាសិស្សវិទ្យាល័យ

រក្សាសិទ្ធិដោយ៖ រៀនគណិតវិទ្យាតាមអ៊ិនធឺណែត