ថ្ងៃនេះ(ថ្ងៃទី២៤ ខែមេសា ឆ្នាំ២០១៩) ជាថ្ងៃចុងក្រោយនៃការប្រឡងសិស្សពូកែទូទាំងប្រទេសសម័យប្រឡង ថ្ងៃទី២២ ខែមេសា ឆ្នាំ២០១៩ ដែលខេត្តសៀមរាបធ្វើជាម្ចាស់ផ្ទះ។
ឆ្លងកាត់តាមការប្រឡងប៉ុន្មានឆ្នាំចុងក្រោយនេះ យើងសង្កេតឃើញថាវិញ្ញាសាសិស្សពូកែលើមុខវិជ្ជាគណិតវិទ្យាថ្នាក់ទិ១២ ចាប់តាំងពីឆ្នាំ២០១៦ មកដល់ឆ្នាំ២០១៩ នេះគឺវិញ្ញាសាត្រូវបានដកចេញពីសៀវភៅដដែលៗ បួនឆ្នាំជាប់គ្នា ដែលសៀវភៅនោះមានចំណងជើងថា Mathematical Olympiad in China ដែលជាសៀវភៅដែលសិស្សពូកែទូទាំងប្រទេសមាននៅក្នុងដៃ។
Admin ធ្លាប់សរសេរប្រយោគនេះនៅឆ្នាំ ២០១៧ ដែលមានខ្លឹមសារថា "ពីរឆ្នាំហើយដែលក្រសួងចេញវិញ្ញាសាសិស្សពូកែ ទូទាំងប្រទេសគណិតទី១២ ពីសៀវភៅដដែល អញ្ចឹងសម្រាប់សិស្សដែលត្រៀមប្រឡងសិស្សពូកែទូទាំងប្រទេសត្រូវតែមានសៀវភៅនេះជាចាំបាច់ "។
ហើយនៅឆ្នាំ២០១៨ ក៏បានសរសេរប្រយោគថា " បីឆ្នាំហើយដែលក្រសួងដកស្រង់លំហាត់ចេញពីសៀវភៅនេះ សម្រាប់ការប្រឡងសិស្សពូកែទូទាំងប្រទេស (គណិតទី១២) ២០១៦-២០១៧-២០១៨ ចេញនេះមិនមែនចេញតែវិញ្ញាសាទី១ទេ គឺចេញទាំងវិញ្ញាសាទី១ និងវិញ្ញាសាទី២! សរុបទៅលំហាត់ប្រហែល ៧០% ទៅហើយ ដែលដកចេញពីសៀវភៅនេះ! "។
ចំណែកឆ្នាំ២០១៩ នេះក៏បានសរសរបន្ថែមប្រយោគថា " មិនមែន៣ឆ្នាំ គឺចេញ៤ឆ្នាំជាប់គ្នា! (២០១៦-២០១៩)
សម្រាប់វិញ្ញាសាទី២ គណិតវិទ្យាទី១២ នឹងចេញពីសៀវភៅនេះដដែល! អ្នកដែលមានសៀវភៅនេះនៅក្នុងដៃ សូមមើលរម្លឹកឡើងវិញឱ្យអស់ ពិសេសលំហាត់ដែលមើលទៅទំនងអាចនឹងចេញ(លំហាត់ចេញឆ្នាំមុនៗមិនចេញដដែលទៀតទេ) ឈ្នះចាញ់ ជាប់ឬធ្លាក់គឺអាចខុសគ្នាតែ១ពិន្ទុប៉ុណ្ណេាះ! អញ្ចឹងសូមសរសេរឱ្យបានផ្ចិតផ្ចង់សរសេរឱ្យបានល្អ! "។
តើក្រសួងមានបានឃើញពីមតិរិះគន់លើការចេញវិញ្ញាសានេះ៣ឆ្នាំកន្លងមកទេ? ហេតុអ្វីក៏នៅតែចេញវិញ្ញាសាពីសៀវភៅដដែលៗ ដែលសិស្សគ្រប់រូបមាននៅក្នុងដៃអញ្ចឹង? ធ្វើដូចម្តេចទើបសិស្សពូកែមានការរីកចម្រើនបន្ថែមទៀត?
តើឆ្នាំក្រោយ (ឆ្នាំ២០២០) នឹងចេញពីសៀវភៅនេះដដែលទៀតឬ?